Заев со сочувство за смртта на Никола Саздовски

Премиерот Зоран Заев преку својата Фејсбук-страница изрази сочувство за смртта на 21-годишниот Никола Саздовски, кој почина вчера на КАРИЛ, десетина дена откако беше брутално претепан на 29 јуни на автобуска постојка во Автокоманда.

„Изразувам сочувство до семејството на младиот Саздовски, нека почива во мир“, напиша Заев во својот пост на Фејсбук.

Тој испрати и апел граѓаните да се воздржат од говор на омраза и разгорување нетрпеливост.

„Омразата и насилството не и прилегаат на Македонија и одат на директна штета на нашата иднина и на нашата младина. Апелирам сите да се воздржиме од говор на омраза и од разгорување нетрпеливост. Само така, ќе им дадеме можност на институциите да си ја завршат својата работа, за што се платени од граѓаните. Правдата и толеранцијата во општеството се наши заеднички цели, да се вложиме целосно и одговорно за да ги достигнеме“, порача Заев.