Откриена поврзаност помеѓу пластиката и појавата на аутизам кај некои деца
Нова научно истражување ја покажува врската на адитив кој го има речиси во секоја пластика и појавата на аутизам кај некои деца. Истражувањето било спроведено од научници од Универзитетот „Роуан“ и Универзитетот „Ратгерс“ во САД.
Во последните неколку децении забележано е алармантно зголемување на дијагнозите на нарушувања од спектарот на аутизам и хиперактивност и недостаток на концретација (АДХД), кај децата, открива најново научно истражување.
Една нова студија укажува на потенцијалната улога на бисфенол А (БПА), вообичаен адитив во пластиката, во овој алармантен тренд. БПА е сеприсутна компонента во процесите на производство на пластика, често присутна во пакувањата за храна и пијалаци. Претходните научни истражувања ја поврзаа БПА со хормонални нарушувања, вклучувајќи рак на дојка и неплодност.
Истражувањето било спроведено од научници од Универзитетот „Роуан“ и Универзитетот „Ратгерс“ во САД. Научниците конкретно го испитувале процесот на глукуронидација, хемиски механизам што телото го користи за отстранување на токсините од крвотокот преку урината.
Резултатите од истражувањето ја истакнаа забележливата разлика во способноста на децата со аутизам и АДХД ефикасно да ја елиминираат БПА и поврзаното соединение наречено диетилхексил фталат (ДЕХП). Овој новооткриен недостаток потенцијално ги изложува овие деца на подолги периоди на токсичните ефекти на овие хемикалии.
Кај децата со аутизам, детоксикацијата се намалила за приближно 11 отсто, додека кај децата со АДХД таа е намалена за 17 отсто во споредба со контролната група.
Научниците сугерираат дека генетските мутации кај одредени индивидуи го попречуваат правилното отстранување на БПА од телото со тоа што дозволуваат супстанцијата да се задржува и потенцијално да влијае врз развојот и функцијата на невроните.
Резултатите од истражувањето се објавени во списанието „ПЛОС ОНЕ“ (PLOS ONE).
