Во Германија се апсат чеченски исламисти

Во повеќе германски покраини полицијата спроведе претреси поради сомненија за „подготовки на тешки насилства кои ја загрозуваат земјата“.

Државното обвинителство во Берлин утрово спроведе претреси во Берлин, Бранденбург, Северна Рајна Вестфалија и Тиринги, а главните акции биле во Берлин и Тиринги. Според пишувањата на дневникот „Билд“, рацијата се спроведува во исламистичка сцена и е насочена против Чеченци.

Обвинителството потврдило дека во Бранденбург, во местото Лудвигсфелд, е уапсено најмалку едно лице, во Берлин најмалку две лица, а во Хаген едно лице.

Уапсените биле долго време следени од страна на надлежните служби, а засега е нејасно дали набавиле вооружување или експлозив. Конкретната цел на планираниот напад се уште не им е позната на истражителите и очекуваат детални информации по анализата на запленетиот материјал.

Чеченските исламистички мрежи веќе долго време важат за многу опасни, бидејќи нивните припадници биле во војна и се обучени за ракување со експлозив.