Бејли удри по членовите на ДИК: За една година земале бонуси во висина од девет плати
![](/wp-content/uploads/2017/12/bejli.jpg)
Членовите на Државната изборна комисија по локалните избори се почестиле со бонуси во износ од четири месечни плати. За нивната работа на предвремените парламентарни во декември минатата година пак си поделиле бонуси во висина од 5 месечни примања.
Информацијата ја обелодени американскиот амбасадор, Џес Бејли, кој имаше предавање за борбата против корупцијата на Факултетот за безбедност во Скопје.
„Гласовите во Комисијата биле едногласни, без разлика на партија или етничка припадност. И персоналот вработен во Комисијата добил помали бонуси. Но гласањето се одржало зад затворени врати, надвор од очите на јавноста. А за агенција со многу потреби што говори тоа за лидерските приоритети?“, вели Бејли.
Бејли постави прашање зошто луѓето да го премолчуваат ова. Тој посочи и кон таканаречените „свиркачи“, но и кон истражувачкото новинарство, бидејќи во јавноста не била доволно запознаена со овие случувања.
Американскиот амбасадор праша и каде биле собраниските алатки за надзор на работата врз ДИК. Од ДИК најавуваат писмена реакција.
Антонио Крстевски за Телевизија 21