Ако забележите затемнета линија под ноктите, без разлика колку е бледа, веднаш одете на преглед. Иако „скриениот меланом“ се јавува многу поретко, нема причина да ги прескокнете советите за рано откривање на најсмртоносната форма на рак на кожата.
Најчесто рак на кожата се јавува на површини кои се редовно изложени на сончевите зраци, па веќе знаеме дека треба што е можно помалку време да минуваме на сонце и при самопреглед да обрнеме внимание на промените кај бемките. Но, малкумина знаат дека постои и таканаречен скриен меланом што може да се забележи на ноктите.
Меланомот под ноктите еднакво често се појавува кај мажи и жени, под ноктите и на рацете и на нозете, а најчесто се забележува на само еден прст. За жал промените на ноктите не се сфаќаат како сериозен показател на болест, а од естетски причини жените многу често се трудат и да ги покријат симптомите со лакирање или надградување.
Симптоми:
– Најчест симптом е кафена или црна лента под ноктот, што многу луѓе го игнорираат сметајќи го за безопасна промена или модринка поради удар.
– Кожата до ноктот потемнува – напредна фаза на болеста
– Ноктот изгледа деформирано или се одвојува од кожата под него.
– При самопреглед не ги заборавајте и помалку видливите делови од кожата, како под пазувите, меѓу ножните прсти и главата (зад ушите, покриено со коса/брада). За деловите што не може да се проверат при самопреглед (очите, во носот, во устата, гениталии, анус) се препорачуваат годишни лекарски прегледи.
