Преку ограда фрлиле торби со марихуана од Македонија во Грција, уапсени двајца албански државјани
Вчера бил спречен шверц на 40 килограми марихуана во заедничка акција на македонската и грчката полиција. Шверцерите прво фрлиле две торби со дрога од Македонија во Грција, а пота и самите ја преминале границата, информираат од МВР.
– Вчера вечер во 23.30 часот од страна на полициски службеници на граничната полиција од Регионалниот центар Југ, во близина на местото викано Вршник Бара, непосредно покрај граничната линија со Република Грција, биле забележани две лица кои од територија на Република Северна Македонија исфрлиле две торби преку жичаната ограда на грчка територија, а потоа и самите ја преминале граничната линија. Поради сомнение дека во торбите се пренесува марихуана, од страна на Регионалниот центар Југ во координација со Одделот за криминалистичка полиција – Сектор за недозволена трговија со дрога оружје и опасни материи, известени се Службата за дрога со седиште во Килкиз и грчката гранична полиција и како резултат на заедничките и координирани активности на полициските службеници од двете земји за кусо време се пронајдени двете торби во кои биле сместени околу 40 килограми марихуана, а малку подоцна се лишени од слобода се В.Х.(36) и Е.Џ.(52), двајцата државјани на Република Албанија. Двете лица од страна на грчката полиција се задржани за понатамошна постапка и против нив ќе бидат поднесени соодветни пријави, изјави Сузана Прањиќ Талевска од МВР.
Ова е втора ваква заедничка акција од почетокот на август помеѓу двете полиции, при што и во првата беше спречен транспорт на 40 килограми марихуана, како резултат на разменети информации помеѓу Секторот за недозволена трговија со дрога при Одделот за криминалистичка полиција, Регионалниот центар Југ и Службата за борба против дрога од градот Килкиз, известуваат од Министерството.
Како што соопшти Сузана Прањиќ Талевска од МВР, во првата акција, на територија на Република Грција беше лишен од слобода грчкиот државјанин Ј.С., кај кого беше пронајдена марихуаната.
