Уапсен директорот на Државниот инспекторат за земјоделство, осомничен дека примил поткуп од 50 илјади евра

Синоќа е уапсен директорот на Државниот инспекторат за земјоделство, Васе Анакиев, во полициска акција во координација со Основното јавно обвинителство за гонење организиран криминал и корупција. Анакиев е уапсен поради сомнение за примање мито во износ од 50.000 евра.

Според обвинението, обвинетиот во периодот од октомври до 13 декември 2025 година, со цел стекнување противправна материјална корист, примил вкупен износ од 50.000 евра за посредување и користење на своето реално влијание со цел да се меша кај судија во Апелациониот суд во Скопјe и, преку поткуп, да влијае врз извршување на службено дејствие што не требало да се изврши.

„По спроведување на сеопфатна истражна постапка, јавен обвинител од Основното јавно обвинителство за гонење на организиран криминал и корупција поднесе обвинителен акт до Основниот кривичен суд во Скопјe против едно лице за кривично дело – Примање надомест за противзаконито влијание, предвидено и казниво согласно Кривичниот законик“, информираат од Обвинителството.

Анакиев е потпретседател на Социјалистичката партија, а за директор беше поставен во јули 2024.

Од Социјалистичката партија, која е дел од власта, соопштија дека нивните очекувања од новата демократска власт се воспоставување на владеење на правото и на правната држава, но и одговорноста во работењето на секој поединец или институција. Од партијата реагираа на објавувањето фотографии од апсењето на нејзиниот член.

„Социјалистичката партија на Македонија жестоко реагира на нападното партиско етикетирање на актуелни случаи со сериозни обвиненија и на тенденциозното објавување фотографии со кои се гази врз човековото достоинство, а за што од одговорните е потребно издржано објаснување. Социјалистичката партија на Македонија ги повикува надлежните институции да постапуваат според закон, одговорно и без селективност да ги преземаат сите активности во разоткривањето на кој било случај за кој постојат основани сомненија за сторен криминал или злоупотреба на службената должност“, се вели во соопштението од СПМ.