Сашо по 8 дена пешачење и поминати 624 км стигна на поклонение во православниот манастир Острог

Скопјанецот Сашо Серафимовски направи голем подвиг. Тој помина 624 километри пешки за да стигне од Скопје до православниот манастир Острог кој се наоѓа во Црна Гора. Серафимовски на пат кон Острог тргна на 5 август, а пристигна пред три дена, односно на 13 август.

Ова негово поклоничко патување траеше цели осум дена и дневно поминуваше речиси 80 километри за да стигне до манастирот.

Воден од својата силна верба во Господ, тој успешно го заврши својот пат, а како што самиот пред тргнување откри на Фејсбук, ова му е 130-тото поклоничко патување, на кое стигна чекор по чекор.

Откако пристигна тој им се поклони на моштите на Свети Василиј Острошки, а на својот Фејсбук профил објави:

„Целта е остварена. Здравје и спасение на сите што ми дадовте поддршка за ова мое патување“, напиша Сашо на фејсбук.

.