Рекордна заплена на Царината, во автобус пронајдени девизи и злато вредно милион евра (ФОТО)
При контрола на автобус македонските цариници заплениле девизи и злато во вредност од еден милион евра. Поточно инспектори од мобилните тимови на Царинската управа вчера на ГП Богородица при контрола на автобус откриле и заплениле 262.750 долари, 155.760 евра и 12 килограми злато и златен накит со проценета вредност од околу 600.000 евра.
Поради постоење сомнеж, автобусот со турски регистарски ознаки управуван од македонски државјанин, кој се движел на редовна линија Скопје – Истанбул (Турција) при излез од земјава бил упатен на детална контрола на царинскиот терминал на ГП Богородица.
При прегледот е откриен специјално изработен бункер во кој се пронајдени разновиден златен накит и златни плочки со неправилна форма, како и голема количина на девизи.
Стоката со вредност од вкупно околу еден милион евра и автобусот се привремено задржани и предадени на Одделението за истраги во Царинската управа за понатамошна истрага, соопштија надлежните.
Со поднесување на соодветни пријави, случајот ќе биде предаден на надлежното Основно јавно обвинителство.
