Српската војска во целосна борбена готовност, чека наредба за да тргне на Косово (ВИДЕО)

Забележано е движење на српската војска и полиција кон Косово, а во касарната на Војската на Србија во Краљево е забележана активност на оклопни возила, јави РТС.

Претседателот на Србија, Александар Вучиќ, денеска нагласи дека во акцијата на специјалните единици на Косово, наречени Росу, уапсени се 23 лица од српската и бошњачката националност во северниот дел на Косово, претежно членови на косовската полиција.

Според него, тоа е обид „за целосна криминализација на нашиот народ“.

Вучиќ во српскиот Парламент рече дека досега на територијата на северниот дел на Косово специјалните единици упаднале со 73 претежно оклопни возила, додека повеќе од 50 возила чекаат во јужна Митровица, 15 во општина Србица, а осум се веќе испратени во реонот на општина Зубин Поток.

– Досега се уапсени 23 лица од српската и бошњачката националност на територија на три општини – Косовска Митровица, Лепосавиќ и Зубин Поток, рече Вучиќ.

Тој потсети дека Белград имал сознанија дека тоа ќе се случи и дека на домашната и меѓународната јавност и претставниците на ЕУ на 17 мај оваа година им било предочено дека на Косово се подготвува апсење на десетици лица во северниот дел, под изговор за борба против организиран криминал и корупција, и дека тоа ќе предизвика голема вознемиреност и страв кај Србите.

Ако има повреда на уставниот поредок и напади врз Срби во северниот дел на Косово, ќе го заштитиме нашиот народ, нагласи српскиот претседател Александар Вучиќ денеска во Собранието на Србија.

Тој додаде дека ова утро, во 6.29 минути како врховен командант, наредил целосна борбена готовност на српската армија.

-Ако постои загрозување на поредокот и животите на луѓето во северниот дел на Косово, нашата армија ќе го заштити нашиот народ, рече Вучиќ.

КФОР потврди дека е во тек операција на косовската полиција, која по наредба на Обвинителството во Приштина се одвива низ цело Косово, и како и косовските власти, тврди дека акцијата на северот на Косово се изведува во рамките на борбата против криминалот.

„Операцијата на косовската полиција се одвива по наредба на Јавното обвинителство на Косово, не само во северниот дел, и не е насочена против Србите, туку против лица обвинети за корупција и криминал“, изјави за Танјуг портпаролот на командата на КФОР Винченцо Грасо.

„Засега ја следиме состојбата, во контакт сме со властите во Приштина, но ние сме отворени и за комуникација со Србија“, вели Грасо.

Според него, во прашање е полициска акција какви што се случувале и во минатото, така што КФОР „само ја следи ситуацијата“.