Левица: Наместо да го екстрадира, Косово го ослободува Алил Демири, повреден е македонскиот суверенитет

Наместо да го екстрадира, Косово го ослободува Алил Демири за убиството на Смилковско езеро, реагираат од политичката партија на ослободувањето на еден од убијците на кај Смилковското Езеро. Одлуката на косовскиот суд според Левица е спротивна на меѓународното право.

Соопштението на Левица ви го пренесуваме во целост:

– Деновиве беше објавено дека судот во Приштина наместо да го екстрадира Алил Демири, одлучил да го пушти на слобода – кој еден од осудените на доживотна казна затвор за громорозното петкратно убиство кај Смилковското езеро!

Оваа одлука на косовскиот суд е СПРОТИВНА на меѓународното право, бидејќи Министерството за правда, според нашите информации, нема добиено никаков одговор за барањето за екстрадицијата на Демири, поднесена уште во 2018. Според тоа, екстрадицијата сѐ уште активна, а косовскиот суд, по секоја основа мораше да го екстрадира во Македонија! Со ова, Косово ги прекрши Договорите за Екстрадација и Трансфер на осудени лица со Република Македонија потпишани во 2011 година.

Ова не е изолиран потег на крајно непочитување и флагрантно провоцирање на Македонија, како и нарушување на македонскиот СУВЕРЕНИТЕТ од страна на косовските власти! Само пред неколку недели, на непоканетата посета на косовскиот премиер Албин Курти во Чаир и Тетово, се вееа знамиња на голема Албанија и комплетно се игнорираа државните инсигнии на Македонија, со што директно се наштетува на унитарноста и угледот на Републиката.

Левица изразува силна осуда, како до косовските власти за грубото прекршување на меѓународното право, билатералните договори и нарушувањето на суверенитетот на Македонија во последните неколку случувања, така и до домашната квислиншка власт, која дозволува сето ова да помине без никаква осуда или соодветна реакција.

Последните настани, како и бројни инциденти претходно, само ја потврдуваат великоалбанската политика, која повеќе не е израз само на маргинализирани групи, туку на официјални државни политики, како кај министрите етнички Албанци во Македонија, така и од другата страна од границата, се вели во соопштението на Левица.