Доказ дека СДС И ДПМНЕ се обични измеќари на ДУИ: Усеини тепал сограѓанин со пиштол, Топалоски вели или ќе ме убие или ќе го убијам (ВИДЕО)

Советникот во Општина Охрид, Нефи Усеини, нападнал сограѓанин во познат охридски хотел, а за тоа е пријавен и во полициска станица, дознава „А1он“. Инцидентот се случил утрово, кога Усеини прво го повикал нападнатиот Спире Топалоски во хотелот, па по кратка вербална расправија, го удирал со пиштол по глава заедно со други лица. Топалоски за „А1он“ вели дека случајот ќе го тера до крај, бидејќи меѓу другото, Усеини замавнувал со пишол пред неговиот 14-годишен син, кој според кажувањата, бил сведок на инцидентот. Усеини, пак, не одговара на телефонските повици за да каже негов став за инцидентот. Од МВР велат дека се преземаат мерки за расчистување на случајот, ПРЕНЕСУВА ПОРТАЛОТ А1ОН.МК.

„Во СВР Охрид, С.Т. (41) од Охрид, пријавил дека пред угостителски објект бил физички нападнат од Н.У. (45) од Охрид. Се преземаат мерки за расчистување на случајот“, велат кратко од МВР.

Топалоски за „А1он“ вели Усеини сега правел притисок врз газдите на хотелот каде се случил инцидентот за снимките од видео надзорот, со кој е снимен инцидентот, да не се дадат на полицијата. Тој бара полицијата да го расчисти целосно случајот или вели дека сам ќе преземе мерки.

„Ме нападна Нефи Усеини, квази криминалецот кој го опостуши цел град. Инцидентот настана поради Зоре Темелковски. Јас правам куќа за четири деца, под Зоре Темелковски во Рача. Јас ја направив куќата и тој повеќе пати ме пријавуваше дека нелегално ја правам куќата, дека копам. Јас го опоменав. Тој наводно, по ова, му рекол на Нефи дека јас сум го опоменал и ‘Да го е**м, ни Нефи, ни Мефи никој нема да те спаси’. Нефи ми се јавува мене и ми вика дојди во ‘Јуник’. Јас нормално, одам. И тој вади пиштол на дете, 14-годишно, на син ми му извади пиштол и му мафташе во нозете. Пиштолот му падна. Кога му падна, јас тргнав да го земам. Само што тргнав да го земам, од позади ме нападнаа уште четворица лица, брат му Ибро и уште двајца, дали од Струга или Охрид, небитно. Влегов во хотелот, сакаа да ме омаловажат, ме тепаа со пиштоли. Јас таму не делував. Можев да земам и пиштол, но не делував. Дојдов во полиција си пријавив се. Разговарав со полицијата и ми рекоа да одам до крај, бидејќи и тие нема да попуштат. И затоа решив да проговорам. Не може во сите случки Нефи да е прав. Сега сум решен, или ќе ме убие или ќе го убијам. На дете 14-годишно, на син ми, пиштол му извади. Жена ми плаче, мајка ми плаче. Око за око, заб за заб. Или државава да преземе нешто за овие што го пустошат цел град или ќе одам до крај за тоа што на детето мое му извади пиштол. Еден кримиалец не може да тероризира секого и секогаш тој да е во право. Цел сум со дупки“, рече Топалоски за „А1он“.

Зоре Темелковски, спортски работник и татко на актуелниот градоначалник на Општина Кисела Вода, Филип Темелковски, вели дека чул дека имало караница во хотелот каде тој пиел кафе, но не знае дека имало физичка пресметка меѓу Усеини и Топалоски.

„Не сум бил сведок. Јас кога го палев џипот, застана еден џип. Јас си заминав. Ми се јавија другари од ‘Јуник’, каде пиеме секој ден кафе и ми рекоа дека нешто се испокарале, ама не знам што.

Ова не е прв инцидент во кој учествувал советникот Нефи Усеини. Усеини во април минатата година спречи инспектор да изврши увид на дивоизградената тераса кај Чинарот, а притоа и му се заканувал. Обвинителството отвори предмети два месеца потоа, односно неколку дена пред Усеини да го натепа советникот во Општина Охрид, Џемал Мена, среде седница.

Охридскиот советник е ослободен од еден случај, за физичкиот напад на професорот Илјаз Илјази кој беше натепан пред неговото престојувалиште во Охрид. Обвинителството кажа дека не знае за настанот, односно не добило пријава од СВР Охрид.

Инаку, по повеќе од година, сите предмети отворени против Усеини во охридското Обвинителство, тапкаат во место. Оттаму последно кажаа дека поради пандемијата, обвинителите работат само на итните случаи, а додека, предметите кои се во редовна постапка како оние за Усеини, ќе се разгледуваат во наредниот период откако ќе се врати нормалното работење на Основното јавно обвинителство Охрид.

Инаку интересно е тоа што и во време на СДСМ и во време на ВМРО-ДПМНЕ, Усеини функционира на идентичен начин. Како да е недопирлив за законот. Пред изборите се појави снимка меѓу поранешниот министер за транспорт и врски Миле Јанакиески и Александар Николоски.

Во снимката, Николоски му препорачува на Јанакиески да не се чепкаат проекти на Нефи Усеини во Охрид, кого го нарекува „бандит“ и посочува дека тоа е дел од договор за  избори.

Во снимката насловена „Николоски градежна мафија со Нефи во Охрид“ се слуша како Јанакиески му кажува на Николоски, кој е родум од Охрид, дека има извесен план за градот, како што вели, за зградите во продолжение на „Гранит“.

„Ооо, никако, тоа е од Нефи, од овој бандитот – Албанецот. Згради се тие, така“, вели Николоски, на што добива потврден одговор од Јанакиески, кој вели дека станува збор за четири згради.

Николоски забележува дека тие објекти се со по осум-девет ката.

„Да, да, од Нефи се тие. Тоа му е дел од договорот за изборите. Никако, те молам“, вели Николоски.