ВМРО-ДПМНЕ: Над 2200 вработувања во еден месец, Ковачевски во паника масовно го полни јавниот сектор со партиски послушници

Над 2200 вработувања во еден месец во јавниот сектор отвора власта на Ковачевски, во надеж дека така ќе го мотивираат своето членство и ќе го ублажат претстојниот пораз. Имено овој поткуп кој го прави Ковачевски граѓаните ќе го платат со милиони евра за плати на партиските послушници на ДУИ и СДС велат од ВМРО-ДПМНЕ.

– Половина од овие вработувања, односно 1117 лица се во министерството за здравство, каде скандалот да биде поголем не се бира според знаење, искуство или квалитет, туку клучен е етничката припадност. Етничкиот клуч ќе одлучува за здравјето и животите на граѓаните. 37 лица се вработуваат во МИОА, ЈПДП и Националната агенција за европски образовни програми и мобилност, а огласи има и во МВР и во Агенцијата за храна и ветеринарство. 500 нови вработувања се прават и во ЕСМ, каде што државната енергетска компанија која едвај одржува ликвидност ќе вработува партиски војници во пресрет на изборите. Масовни вработувања се прават и во ФЗОМ на 41 лице, МНР 15 лица, во транспорт и врски 9 нови луѓе. Очигледно е дека власта е во паника, бидејќи да се работело за природен одлив на вработени, огласи ќе имаше во текот на целата година, а не вака масовно да се прави на неколку месеци од изборите.

СДС и ДУИ и оние кои спроведуваат вакво масовно обременување на администрацијата треба да се свесни дека сите овие огласи потребно е да бидат предмет на ревизија и секое прекршување и партиско вработување треба да биде најстрого санкционирано. Ваквите огласи се една од најглавните причини зошто јавната администрација е на критика на ЕУ и сите меѓународни извештаи. Македонија мора да заврши со лошите практики на владеење, затоа што никогаш не било полошо, се вели во соопштението од партијата.