ВИДЕО: Вака македонската полиција ги апсеше дилерите на дрога

Министерството за внатрешни работи попладнево соопшти дека вчера во рамки на акцијата „Мрежа“ која се спроведува за сузбивање на уличното дилерство на дрога, Одделот за Сузбивање на Организиран и Сериозен Криминал при МВР реализираше случај при што откриена е криминална група составена од пет лица и тоа С.Р. (51), З.М.(29), М.Д. (26), М.М.(36) и З.С. (34).

Како што се наведува во соопштението, според документираните сознанија во текот на минатата и оваа година криминалната група организирана од С.Р. која делувала на подрачјето на Град Скопје како и надвор од градот, продавала наркотична дрога кокаин за цена од 3000 до 4500 денари за една паковка. Кокаинот бил набавуван од непознато лице од Србија во помали количина, со цел полесен и побезбеден транспорт на наркотичната дрога.

Во рамките на меѓународната полициска соработка ќе се превземат дополнителни активности за идентификување на српскиот државјанин.

„Од страна на С.Р како организатор на групата, биле ангажирани МД. и М.З. кои го продавале кокаинот на нарко зависници, а по продажбата редовно го известувале С.Р. за паричните сретства кои биле добиени. Исто така утврдено било дека лицето М.М. исто така посредувал во вршењето на продажбата на наркотична дрога кокаин, така што кога имало потреба за продажба на дрога, го известувал С.Р. и ја вршел продажбата, а дел од парите ги задржувал за себе“ стои во соопштението.

Полицијата по претходно издадени наредби за претрес на дом и други простории од страна на Судија на претходна постапка извршени се претреси на пет локации .

„При преземените мерки и активности во однос на извршените претреси, пронајдени и со потврда одземени се следните предмети: во домот на С.Р. одземени се една полиетиленска паковка со бела прашкаста материја, 50 куршуми 9мм, едно возило „голф 5“ и три мобилни телефони; во домот на З.М. одземени се четири полиетиленски паковки со непозната бела прашкаста материја; во домот на М.Д. одземени се 22 куршуми 5,56мм, реденик со 12 патрони со различен калибар,43 патрони со калибар 16мм, куршум 7,65мм, најлон кеса со непозната растителна материја , чинија со бела прашкаста материја и мобилен телефон; во домот на М.М. одземени се седум банкноти од по 1000 денари, две банкноти од по 500 денари и еден мобилен телефон“, се додава во  соопштението.

Како што стои во соопштението денеска е уапсен и З.С. од село Врапчиште-гостиварско и обезбедено од страна на полициски службеници од СВР Тетово.

„Исто така во текот на криминалистичкото истражување ова лице е претходно документирано за кривично правен настан со недозволена трговија со дрога и беше одземена првата количина кокаин од 9,77 грама“, наведува МВР.

Во текот на денот од страна на ОКТИВ ќе биде извршено вештачење на предметите пронајдени при претресите, а до надлежното ЈО ќе биде поднесена кривична пријава против лицата за сторени кривични дела„неовластено производство и пуштање во промет на наркотични дроги,психотропни супстанции и прекурсори“ и „недозволено изработување, држење и тргување со оружје или распрскувачки материи“ и истите ќе бидат спроведени пред Судија за претходна постапка.