Рускиот митрополит Тихон: Во тек е трета светска војна

Митрополитот Тихон (Шевкунов) од Псковско-печерскиот манастир ја нарече пандемијата на Ковид-19 трета светска војна, во која целото човештво се бори против еден непријател – новиот коронавирус, пренесува „Спутник“.

„По 75 години, повторно е војна – светска војна. Воопшто не преувеличувам, не вршам притисок на вас со некоја посебна загриженост, страв. Тоа навистина е така: во тек е војна меѓу човештвото и тоа зло што влезе во човечкиот род и против кое ни претстои вистинска борба, баш како и на нашите дедовци и татковци за време на војната“, рекол митрополитот за време на проповедта.

„Еден мој пријател, православен христијанин, кој живее во мал град во северна Италија, како нашето место, со неколку илјади луѓе, ми се јави неодамна и ми рече: Не верувавме дека тоа може да се случи. Цела генерација почина во нашиот град – стари над седумдесет години“.

Митрополитот Тихон ги повика верниците да не го посетуваат Псковско-печерскиот манастир, кој се смета за еден од најстарите во Русија и кој не бил затворен ни за време на Втората светска војна.

„Како епископ од Псков, ве благословувам да се молите од дома. Сега не е време да се собираат многу луѓе, вклучително и во храмовите“, рече тој.

Митрополитот Тихон неофицијално се смета за духовник на рускиот претседател Владимир Путин иако никогаш не го потврдил тоа.