Мултимилионер им ја подари компанијата на вработените

Германскиот мултимилионер Хелмут Шлотерер им даде вреден подарок на своите работници. Имено, тој им ја подарил целата модна компанија „Марк Кејн“. Фабриката во иднина ќе им припаѓа на работниците.

Како што соопшти компанијата, многу богатиот основач Хелмут Шлотерер ги префрлил своите акции на вработените. Така, вредностите на компанијата треба да се зачуваат и во иднина, пренесува списанието Феникс.

– Продажбата на компанијата никогаш не беше опција за мене, а бидејќи мојата сопруга и јас немаме деца, решив да создадам основа за да ја одржувам компанијата, изјави Шлотерер во соопштението за печатот.

Компанијата произведува женска облека, а е и извозник во неколку десетици земји. Во 2020 година, компанијата имаше продажба од околу 200 милиони евра ширум светот. Шлотерер ја водеше компанијата повеќе од 50 години, пишуваат германските медиуми.