Главeн херој во Турција во последните денови е градоначалникот на градот Ерзин Океш Елмасоглу. Иако тој град беше во епицентарот на разорниот земјотрес, во него не е уништена ниту една зграда, ниту пак има жртви, бидејќи Елмасоглу не дозволил дивоградба.
Турскиот претседател Реџеп Таип Ердоган изјави во вторникот дека земјотресите од минатата недела биле со „јачина на атомска бомба, додавајќи дека секоја земја би се соочила со истите последици како Турција „во случај на таква катастрофа“. Сепак состојбата со Градот Ерзин, која се наоѓа среде силно погодениот од земјотрес регион Хатај, ги негира тврдењата на турскиот претседател. во овој град никој не загина, а ниту една зграда не беше значително оштетена. Оштетени се само неколку семејни куќи и неколку минариња во градот со 42.000 жители.
– Немаме урнатини, жртви или повредени поради земјотресот, рече градоначалникот на овој град, Океш Елмасоглу, изразувајќи сочувство до сите погодени од земјотресот.
Како што вели, причината поради која во неговиот град нема урнати згради, а потоа и мртви е тоа што никогаш не дозволил никаква дивоградба.
– Не дозволив дивоградба во ниту една смисла. И покрај тоа, некои се обидоа. Иако на почетокот не можевме да ги следиме бидејќи немавме доволно надлежни лица, подоцна ги пријавивме кај обвинителот и зградите беа урнати, рече градоначалникот, пишува „Хуриет дејли“.
Понатаму, градоначалникот додава дека повеќето згради во градот се релативно ниски. Тоа се самостојни згради, повеќето четирикатни, а некои се на шест ката, вели тој.
Додава дека во Турција треба да има целосна промена на размислувањето кога станува збор за градежништвото.
– За тоа е потребно нашите граѓани да не очекуваат никакви отстапки од државата за дивоградба, да не посегнуваат по такви работи и да се преземат решителни чекори за рушење на овие објекти кога е потребно. Потребни ни се контролни механизми за непречено да функционираат работите, додава тој.
