Во овој град ако работите ќе бидите најплатени

Кој е градот каде странците се најплатени во светот? Според најновото истражување на банката ХСБЦ, тоа е Мумбај, Индија.

Резултатите од истражувањето се базираат на податоци од 27.587 вработени низ целиот свет.

Анализата покажува дека странците кои работат во најголемиот индиски град и финансиски центар во Индија, заработуваат просечна годишна плата од 217.165 долари, што е повеќе од двојно повисоко од светскиот просек од 99.903 долари.

Вториот најпрофитабилен град за странци зад финансискиот центар Мумбај е Сан Франциско, САД. Странците кои работат во Сан Франциско можат да очекуваат просечна годишна плата од 207.227 долари.

Мумбај е еден од четирите азиски градови кои годинава се рангирани во првите 10. Рамо до рамо со европските и американските градови каде платата на странците е традиционално висока, се и Шангај, Џакарта и Хонгконг.

Според студијата на ХСБЦ, странците заработуваат повеќе од 100.000 долари годишно (во просек) во 31 град во светот.

Од 21-те градови кои се под просекот, најниска плата за странците нуди Единбург. Странските државјани кои работат во шкотскиот главен град пријавиле просечен приход од 56.250 долари годишно.

Една позиција над Единбург е Лисабон со 60.913 долари, а пред него се Бирмингем и Барселона, каде што странците добиваат во просек 61.950 долари и 65.070 долари годишно, соодветно.

Сосема спротивност е Цирих. Градот е рангиран на третото место, по Мумбај и Сан Франциско, со 206.875 долари плата за странци во просек.

Единствениот друг град во кој странците во просек заработуваат над 200.000 долари годишно е Шангај.